EE MUNGU
NISAIDIE NIIONE NJIA IENDAYO UZIMANI
Maono: Niliona tukipita kwenye kamlango kadogo sana ambako
mtu hawezi kupita kwa njia ya kawaida isipokuwa kwa kuburuzika kwa tumbo.
Hakuna aliyeweza kupita akiwa amebeba kitu au akisaidiana na mwenzake.
Naamini Roho wa Mungu anatukumbusha tu kwamba safari ya
mbinguni inahitaji kujikana na sio rahisi kama wengine wanavyorahisisha.
Lk 13:23,24 “Mtu mmoja akamwuliza, Je! Bwana, watu wanaookolewa ni wachache?
Akawaambia, Jitahidini kuingia katika mlango ulio mwembamba, kwa maana
nawaambia ya kwamba wengi watataka kuingia, wasiweze.” Lk 18:26,27 “Nao waliosikia walisema, Ni nani basi
awezaye kuokoka? Akasema, Yasiyowezekana kwa wanadamu yawezekana kwa Mungu.”
Ukifuatilia sana jibu la Yesu kuhusu
wokovu utagundua mambo kadhaa. 1. Sio kazi rahisi kwa mwanadamu (jitahidini) 2.
Wengi watataka lakini hawataweza kufikia viwango (masharti) 3. Kwa kuwezeshwa
na Mungu inawezekana (neema).
Nimekuwa nikitafakari kwa nini ni vigumu
kwa wengi kujiandaa na safari ya mbinguni. Jibu ni rahisi tu. Kuna watu
wanataka kuingia mbinguni kwa matendo yao mema bila kujali kumpokea Yesu Kristo
ambaye ni NJIA, KWELI na UZIMA. Lakini pia kuna watu wanajali tu uraia wao wa
duniani na hawajali kabisa kwamba kuna maisha mengine baada ya hapa ambayo ni
ya uhakika zaidi.
Nitatumia Mathayo 7:13-27 kutuandaa kwa
ajili ya maombi ya wiki hii.
1.
Unaweza kuwa muumini kwenye dini yako na usione ‘njia iendayo uzimani’
Mst wa 13,14 “Ingieni kwa kupitia mlango ulio mwembamba; maana mlango ni mpana, na
njia ni pana iendayo upotevuni, nao ni wengi waingiao kwa mlango huo. Bali
mlango ni mwembamba, na njia imesonga iendayo uzimani, nao waionao ni wachache.
Dini ni juhudi za mwanadamu za kumtafuta
Mungu wakati wokovu ni mpango wa Mungu wa kumtafuta na kumuokoa mwanadamu. Yesu
Kristo hakuleta dini duniani bali wokovu wa roho zetu. Wala sio Wakristo
waliojiita hivyo bali walipewa jina hilo na watu ambao hawakuwa Wakristo (Mdo
11:26). Kabla ya Antiokia waliitwa watu wa Njia ile (Mdo 19:23). Jina la
Wakristo limekuwa likibadilika kadiri wahusika wanavyojichanganya. Kwa sasa
unaweza kusema u mkristo na bado una michanganyo. Hivyo kuna majina mengine yamejitokeza
kama vile, Mkristo aliyeokoka, mlokole, Mkristo jina, mlokole feki nk ili tu jina
liendane na tabia halisi ya mtu.
Maandiko yanatuambia WENGI wanapitia
mlango mpana (maisha ya kidini yenye uhuru usio na mipaka) na WACHACHE
wanapitia mlango mwembamba (maisha ya kujikana nafsi na kutambua kwamba uraia
wetu uko mbinguni na hapa tu wapitaji tu). Ukiona tu kwamba huwazi kwamba
utawezaje kukaa na Bwana baada ya maisha haya ya duniani, bado hujaona njia
iendayo uzimani. USIPENDE KUCHAGUA NENO UNALOTAKA KUSIKIA. SIFA ZA NENO LA
MUNGU NI KUCHOMA NA KUKATA KOTEKOTE KULIKO SIME. Waebrania 4:12 “Maana Neno la Mungu li hai, tena lina
nguvu, tena lina ukali kuliko upanga uwao wote ukatao kuwili, tena lachoma hata
kuzigawanya nafsi na roho, na viungo na mafuta yaliyomo ndani yake; tena li
jepesi kuyatambua mawazo na makusudi ya moyo.” Kuna siku utakumbuka
mafundisho magumu uliyokwepa kuyasikiliza ukiwa tayari umehukumiwa. Hatukuja
duniani kwa ajili yetu wenyewe. Tumeitwa kwa kusudi la Mungu (Rum 8:28).
2. Tambua
watumishi wa kweli kwa tabia (character) na sio vipawa (charisma)
Mst 15-20 “Jihadharini na manabii wa uongo, watu wanaowajia wamevaa mavazi ya
kondoo, walakini kwa ndani ni mbwa-mwitu wakali. Mtawatambua kwa matunda yao.
Je! Watu huchuma zabibu katika miiba, au tini katika mibaruti? Vivyo hivyo kila
mti mwema huzaa matunda mazuri; na mti mwovu huzaa matunda mabaya. Mti mwema
hauwezi kuzaa matunda mabaya, wala mti mwovu kuzaa matunda mazuri. Kila mti
usiozaa tunda zuri hukatwa ukatupwa motoni. Ndiposa kwa matunda yao
mtawatambua.”
Huwezi kuwagundua watumishi wa uongo kwa
kushiriki tu ibada peke yake. Mara nyingi wakiwa wanahudumu ibadani wanavaa
ngozi ya kondoo (wanaigiza utakatifu). Wanakuwa mbwa mwitu kabla na baada ya
kuhudumu ibadani. Maisha yao nje ya ibada yako tofauti sana. Hutashangaa
ukiwaona kwenye baa na wanawake wenye mizigo ya dhambi, wakiwarubuni waumini,
wakitapeli watu, wakizini na wanawake ndipo wasimame mimbarini, wakijitajirisha
huku waumini wakifilisika nk. 2 Timotheo 3:6 “Kwa maana katika hao wamo wale wajiingizao katika nyumba za watu, na
kuchukua mateka wanawake wajinga wenye mizigo ya dhambi, waliochukuliwa na
tamaa za namna nyingi.”
Kipindi hiki shetani amekusudia
kuwavamia watumishi kwa roho ya zinaa na kupenda umaarufu (popularity). Tuwe
macho na kulinda moyo kuliko yote tulindayo (Mit 4:23).
3. Karama
alizo nazo mtumishi zisikupofushe macho, chunguza mwenendo wake
Mst 21-23 “Si kila mtu aniambiaye, Bwana, Bwana, atakayeingia katika ufalme wa
mbinguni; bali ni yeye afanyaye mapenzi ya Baba yangu aliye mbinguni. Wengi
wataniambia siku ile, Bwana, Bwana, hatukufanya unabii kwa jina lako, na kwa
jina lako kutoa pepo, na kwa jina lako kufanya miujiza mingi? Ndipo nitawaambia
dhahiri, Sikuwajua ninyi kamwe; ondokeni kwangu, ninyi mtendao maovu.”
Kuna watumishi wanaigiza karama za Roho
na wengine wanapewa na shetani uwezo wa kutambua shida za watu kupitia pepo wa
uaguzi. Pepo huyu alitaka kumdanganya mtume Paulo lakini akamgundua. Huyo pepo
anaanza kukuambia ukweli ili umuamini kisha badae anapindisha ukweli. Kama una
Roho wa Mungu hutaangalia tu UKWELI WA TAARIFA bali pia CHANZO CHA TAARIFA
HIYO. Mdo 16:16-18 “Ikawa tulipokuwa
tukienda mahali pale pa kusali, kijakazi mmoja aliyekuwa na pepo wa uaguzi
akatukuta, aliyewapatia bwana zake faida nyingi kwa kuagua. Akamfuata Paulo na
sisi akipiga kelele, akisema, Watu hawa ni watumishi wa Mungu aliye juu, wenye
kuwahubiria njia ya wokovu. Akafanya hayo siku nyingi. Lakini Paulo
akasikitika, akageuka akamwambia yule pepo, Nakuamuru kwa jina la Yesu Kristo,
mtoke huyu. Akamtoka saa ile ile.”
Unaweza kudhani umeponywa na Mungu na
kumbe ni uponyaji wa kiina macho kutoka kwa shetani. Kinachotokea ni tatizo
lako kuhamia tu upande mwingine. Unaingiziwa pepo lenye nguvu ya kudhibiti lile
lililokupa ugonjwa (mapepo yanatofautiana mamlaka) halafu unajikuta tatizo
limehamia kwenye ugumu wa maisha, zinaa au mahusiano kuvunjika. Shetani
anachotaka ni wewe kuendelea kuwa mtumwa wake.
4. Kujua
kwako mambo mengi bila kuyafanyia kazi hakutakusaidia wakati wa vita
Mst 24-27 “Basi kila asikiaye hayo maneno yangu, na kuyafanya, atafananishwa na
mtu mwenye akili, aliyejenga nyumba yake juu ya mwamba; mvua ikanyesha,
mafuriko yakaja, pepo zikavuma, zikaipiga nyumba ile, isianguke; kwa maana
misingi yake imewekwa juu ya mwamba. Na kila asikiaye hayo maneno yangu
asiyafanye, atafananishwa na mtu mpumbavu, aliyejenga nyumba yake juu ya mchanga;
mvua ikanyesha, mafuriko yakaja, pepo zikavuma, zikaipiga nyumba ile,
ikaanguka; nalo anguko lake likawa kubwa.”
Shetani haogopi kujua kwako mambo mengi
ikiwa hufanyii kazi unayoyajua. Ndiyo maana tuna watumishi wengi waliosomea
mambo mengi ya Mungu lakini wanaanguka kila uchwao. Shetani pia anajua mengi
sana kuhusu Mungu maana amekaa na kutumika mbinguni lakini hatendi mapenzi ya
Mungu. Yak 2:19,20 “Wewe waamini ya kuwa
Mungu ni mmoja; watenda vema. Mashetani nao waamini na kutetemeka. Lakini
wataka kujua, wewe mwanadamu usiye kitu, kwamba imani pasipo matendo haizai?”
Kama unajua mambo mengi kuhusu Mungu lakini hutendi mapenzi ya Mungu, HUNA
TOFAUTI NA SHETANI. Tofauti yako na shetani itakuja pale utakapoacha kazi zake
na kufanya mapenzi ya Mungu.
Majaribu yanakuangusha kwa vile nyumba yako
haina msingi imara. Jifunze kuwa mtendaji wa Neno la Mungu ndipo utakuwa
salama. Usitafute dini bali mtafute Mungu maadamu anapatikana (Isa 55:6).
MAOMBI
1. Ee Mungu naomba unisaidie niione njia
ya uzima ili nisipoteze muda wangu kuabudu na kutoa sadaka wakati hunijui.
2. Ee Mungu naomba unipe macho ya
kutambua watumishi wa kweli uliowaita ili nisiangukie kwa mbwamwitu.
3. Ee Mungu nisaidie nisipofushwe macho
na miujiza kiasi cha kuuamini uongo na mwisho kuhukumiwa milele.
4. Ee Mungu naomba unisaidie niweze
kutendea kazi mambo mengi niliyojifunza ili nisiendelee kuanguka kiroho na
kimaisha.
